Alty Alashtyń ardaqtysy Maǵjan Jumabaevtyń 125 jyldyq toıy týǵan jerinde odan ári jalǵasty.
M. Qozybaev atyndaǵy Soltústik Qazaqstan memlekettik ýnıversıtetinde ótken «Maǵjan Jumabaev murasy jáne álemdik rýhanııat» atty halyqaralyq ǵylymı-tájirıbelik konferensııaǵa jınalǵan sheteldik, otandyq ǵalymdar, maǵjantanýshylar,zertteýshiler túrki jurtyna ortaq tulǵanyń shyǵarmashylyq erekshelikteri jaıly baıandamalar jasap, tanymdyq oı-pikirlerimen bólisti. Alqaly basqosýda sóılegen sózinde oblys ákimi Qumar Aqsaqalov «jarqyrap kúnge tabynǵan, ózine ǵana baǵynǵan, júregi men jany ot» arqaly aqyn murasy jas býyn boıynda otanshyldyq sezimderdi qalyptastyrýda zor tárbıe quraly bolyp qala beretinin atap ótti. «Rýhanı jańǵyrý» baǵdarlamasy aıasynda jerlesimizdiń ómiri men shyǵarmashylyǵyn nasıhattaý isine zor úles qosqan bir top azamatqa «Maǵjan Jumabaev» tósbelgisi saltanatty túrde tabys etildi. Aqparat jáne kommýnıkasııa mınıstrliginiń «Estelik jáne mereıtoılyq datalar» serııasymen ázirlegen «Maǵjan Jumabaevtyń týǵanyna 125 jyl» poshta markasy aınalymǵa engizildi. «Bizdiń Maǵjan» ekitomdyq eńbektiń, «Maǵjan Jumabaev» ensıklopedııasynyń tusaýkeseri uıymdastyryldy.
Jıynda Bilim jáne ǵylym mınıstri Erbol Saǵadıevtyń, halyqaralyq Túrki akademııasynyń prezıdenti Darhan Qydyráliniń, Parlament Májilisiniń depýtaty Abaı Tasbolatovtyń mereıtoıǵa joldaǵan Quttyqtaý hattary oqyldy. «TÚRKSOI» halyqaralyq uıymynyń Bas hatshysy Dúısen Qaseıinov, AQSh-taǵy Mıchıgan ýnıversıtetiniń professory Tımýr Qojaoǵly, Gazı ýnıversıteti Túrkitaný ortalyǵynyń dırektory Hýlııa Chengel, Astanadaǵy Agrarlyq ýnıversıtettiń professory, tarıh ǵylymdarynyń doktory Hankeldi Ábjanov,Qaraqalpaqstannyń halyq aqyny Muzafar Ahmad, Qyrǵyzstan Jazýshylar odaǵynyń tóraǵasy Aqbar Rysqulov, taǵy basqalary álemdik deńgeıde ulyqtaýǵa laıyq ult tarlanbozynyń rýhy ǵasyrlar boıy jasaı beretinin, onyń esimi «Máńgilik El», «Uly Dala» uǵymdarymen tyǵyz sabaqtas ekenin alǵa tartty.
«Maǵan ataq ultym úshin ólgenim!» dep halqy úshin basyn ólimge tikken aqyn mereıtoıy «Maǵjan kóktemi» respýblıkalyq óner festıvali men gala-konsertke jalǵasty. Onda jazba aqyndar múshaırasy, aqyn óleńderine jazylǵan jańa ánder men kórkemsóz sheberleri atalymdarynyń ár kezeńdegi jeńimpazdary men júldegerleri sahna tórine kóterilip, jyrdan, ánnen shashý shashty.
О́mir ESQALI,
«Egemen Qazaqstan».
Soltústik Qazaqstan oblysy